TB. Iskandar Kapilih Jadi Ketua BPPKB Banten DPC Kab. Bandung

0
183

Kab. Bandung, bewarajabar.com – TB. Iskandar resmi kapilih jadi Ketua Dewan Pimpinan Cabang (DPC) BPPKB Banten Kab. Bandung periode 2021-2026, ngaganti Ketua samemehna nyaeta H. Ade Kurnia.

Kukapilihna TB. Iskandar, Tongkat kapamingpinan Dewan Pimpinan Cabang (DPC) Badan Pembinaan Potensi Keluarga Besar (BPPKB) Banten Kab. Bandung, sacara resmi ganti.

Prosesi ganti pimpinan ngaliwatan Musyawarah Cabang (Muscab) nu digelar di Gedong Da’wah Islam Soreang, Kab. Bandung poe Saptu, (6/3/2021). Sacara aklamasi peserta Muscab milih TB. Iskandar jadi Ketua DPC BPPKB Banten Kab. Bandung periode 2021-2026.

Muscab nu diluuhan ku Dewan Pimpinan Pusat (DPP) jeung Badan Pembina BPPKB Banten lumangsung lancar taya halangan harungan. Hasilna, ti 70 nu milih, TB. Iskandar meunang pangrojong sapinuhna, kalawan sacara aklamasi bisa disebutkeun calon tunggal.

Tapi najan aya dina kaunggulan, dirina tetep ngaharepkeun support, gawe bareng jeung nasehat ti sakumna jajaran penasehat turta pangurus supaya bisa ngajalankeun roda organisasi sacara maksimal.

“Alhamdulillah muscab lumangsung sacara demokratis.Naon nu dihasilkeun teh ngarupakeun hasil sarerea ngawujudkeun hiji cita-cita, nyaeta ngagedekeun BPPKB Kab. Bandung. Ulah aya kubu-kubuan. Urang ngahiji sabeungkeutan, BPPKB nu urang sarerea. Pikeun ngahijikeun seuweu-siwi BPPKB, tangtuna butuh pangrojong ti sakumna, ” ceuk TB. Iskandar ngajentrekeun.

Ditandes oge ku inyana, yen agenda pang deukeutna tina kapangurusanana nyaeta ngabentuk jeung ngarapihkeun struktur di tingkat DPC, PAC, nepi ka Ranting.

“Kuring miharep struktur dieusi ku figur nu berkompeten, boga waktu jeung siap ngagedekeun organisasi. Sanggeus kitu, bakal dilaksanakeun raker pikeun nyusun program kerja, nepi ka pamahaman AD/ART,” pokna.

Leuwih jauh TB. Iskandar ngadadarkeun, yen dirina kapilih jadi Ketua DPC BPPKB Banten Kab. Bandung, mibanda harepan Lembaga nu dikomandona nyaeta BPPKB Kab.Bandung supaya jadi hiji Lembaga nu diperhitungkeun, kalawan meunang pangrojong ti masyarakat.

Jeroning kitu, Agus Rangga salah saurang peserta Musyawarah Cabang (Muscab) BPPKB Banten DPC Kab.Bandung ngaharepkeun, ku kapilihna Ketua anyar, BPPKB DPC Kab. Bandung, jadi lembaga nu tetep diperhitungkeun sarta beuki unggul.

“Mugia kapilihna TB. Iskandar jadi Ketua DPC nu anyar, BPPKB DPC Kab.Bandung jadi Lembaga nu diperhitungkeun jeung tetep jaya,” kitu harepan Agus Rangga.

LEAVE A REPLY

Please enter your comment!
Please enter your name here