Pameuntasan Situ Cipule

0
92
Pameuntasan Situ Cipule ngagunakeun parahu eretan ponton. (Poto: Sunta Atmaja)

Karawang, Bewarajabar.com — Warga Karawang jeung sabudeureunna nu digarawe di Kecamatan Ciampel jeung di Kecamatan Klari sering ngamangpaatkeun pameuntasan Situ Cipule nu ngahubungkeun Kampung Kaum Desa Mulyasari Kecamatan  Ciampel jeung Kampung Karajan Desa Cimahi Kecamatan Klari, meuntas walungan Citarum.

Memeh aya galian keusik nu jadi Situ Cipule tempat lomba dayung internasional, ieu pameuntasan teh geus aya. Taun 80-an ieu pameuntasan kandaraanna ngagunakeun parahu dayung, ukur bisa ngamuat jalma, ongkosna Rp 100,-

Kiwari, pameuntasan teh ngagunakeun kandaraan “parahu eretan ponton”, mimiti dijieun bisa ngamuat  jalma, motor jeung mobil, ayeuna bisa ngamuat jalma jeung motor, ongkosna Rp 2.000,-.

Situ Cipule pernahna sisi Citarum, aya di opat kampung, nyaeta, Kampung Cipule, Kampung Kaum, Kampung Ciampel jeung Kampung Kampungsawah Desa Mulyasari Kecamatan Ciampel, Karawang tatar kidul.

Kecamatan Ciampel mangrupa puseur kota industri di Karawang, tempat ngadegna Kawasan Kota Industri Suryacipta, Kawasan Industri Mitra Karawang, jrrd. Kecamatan Klari mangrupa zona industri, tempat ngadegna pabrik-pabrik di sela-sela lembur.

Nu digarawe di ieu tempat diantarana loba nu ngaliwat bendungan Walahar di Desa Walahar Kecamatan Klari. Nu ngaraliwat teh lain ukur urang Ciampel jeung Klari wungkul, tapi oge loba urang Telagasari, Tempuran, Purwasari, Cikampek, Lemahabang, Kotabaru, Jatisari, jrrd.

Ku kituna, boh isuk boh sore patali marga nu ngahubungkeun ieu dua kecamatan kacita ramena. Di sasak bendungan Walahar patali marga sering macet. Pikeun ngahindar macetna di ieu sasak diantarana nu ngaraliwat teh aya nu meuntas di pameuntasan parahu eretan Situ Cipule.

Ari lolobana mah nu meuntas di pameuntasan Situ Cipule teh warga nu aya di dua desa nu dihubungkeun ku ieu pameuntasan nyaeta warga Desa Mulyasari Kecamatan Ciampel jeung warga Desa Cimahi Kecamatan Klari.

LEAVE A REPLY

Please enter your comment!
Please enter your name here